Mbak Armi ngeslah motore.
Ora gantalan suwe motor wis nggleser maring panggonan
kerja. Kadidene muslimah, kebeneran dheweke nganggo hijab utawa jilbab. Ningen
senajan kaya kuwe, kewajiban nganggo helm tetep delakoni, senajan cekadhang
helm-e kuwe cokan maraih kudhunge kusut. Mulane lewih sering nunggang motor,
helm-e deslobokaken nang lengene.
Bareng tekan prapatan bangjo, pas motore mandheg ana
pulisi sing njaga nang pinggir. Matane Mbak Armi mlolo bareng weruh pulisi
kuwe. Kayane pulisi anyar tugas. Biyasane papan kuwe ora nana pulisi. Sing
penting kanggone si Mbak, pulisine nggantheng banget.
Dina ngesuke Mbak Armi sengaja nganggo kudhung sing ana
sanggule utawa sing cokan desebut jilbab
punuk onta. Lah kepriben jajal? Mesthi baen
helm-e ora muat, mulane
helme degawa tah degawa, ningen gur deslobokaken meng lengene.
helme degawa tah degawa, ningen gur deslobokaken meng lengene.
Priiit!
“Minggir Mbak ….. maaf, njenengan ora nganggo helm.”
omonge pulisi anyar bareng weruh Mbak Armi ora nganggo helm tur nang ngarep
irunge pulisi pisan.
“Oooo … napa salaeh kula si?”
“Tata tertib Mbak! Helm harus dipakai!”
“Mboten saged Pak. Lah niki helm-e!”
“Kari nganggo thok koh!”
“Niki jilbabe kula jilbab punuk onta. Helme mboten
mlebet.”
“Angger kaya kuwe, motore njenengan tek tahan nang pos
kono.”
“Nggih ampun Paak….”
“Lho ya kepriben si? Angger wis genah tek culaken, genah
inyong mengko malah darani aparat sing conggresan, apara sing ora bener! Some
ye!”
“Kula telat ngantor kepripun Pak, engke kula desetrap.”
omonge pura-pura garep nangis.
“Eng…. kepriben ya?” omonge pulisi gantheng kuwe
karo kukur-kukur sirah.
“Kula enten usul niki Pak!”
“Apa usule?”
“Kula rila mawon motore kula detahan teng pos pulisi
ngriku, ningen kula mengke telat. Kados pundi upami Pak Pulisi ngeteraken kula
mawon?” takone Mbak Armi.
“Inyong ngeteraken ko?”
“Enggih.”
“Enak saja!”
“Paling gur sekawan menit thok Pak. Kantore kula mboten
tebih koh Pak, kersa nggih Pak nggih?”
“Emmmm gimana nih?”
“Kula meh telat niki Paaak….” omongane Mbak Armi karo
nyekeli lengene Pak Pulisi.
“Ya uwis mayuh tek bonceng!”
“Alhamdulillaaaah … leres kula debonceng Pak?”
“Iya iyaaa … wis gageyan nyemplak!”
“Enggih!”
“Tapi awas aja ngampel bangkekan lho ya!”
"Cepengan pundhak mawon nggih
Pak?"
"Ya ngonoh!"
Ora dekaya ngapa senenge Mbak Armi.
Akal buluse bener-bener mandi. Ngimpi apa esuk kuwe
debonceng pulisi nggantheng. Mangkane agi wingi baen dheweke weruh pulisi kuwe,
ningen kayane dalane nggo kenalan koh lancar banget.
Mbak Armi mesem dhewekan.
Wong wadon kuwe ora ngerti yen nang mburine kawit mau
bojone ngulati sapari polaeh klecam-klecem dhewekan.
“Ana apa si ngguyu dhewek Jeng?” takone sing lanang. Mbak Armi
mbalik.
“Oalah Mas….. inyong agi kemutan dhong gemiyen inyong
sengaja nglanggar lalu lintas ben deukum njenengan. Eh, malah beneran sekiye kesembadan,
wis anak-anak nganti ana telu.”
“Iiiiiihhhh….. dhasar akal bulus! Ningen buluse ayu sih!”
“Em si Mase ….. ah…” omonge Mbak Armi karo nglendhot.
Wong loro akhire padha crita nostalgia gemiyen dhong agi
kawitan padha ketemu. Wuih, maraih ngiri baen. ***
Diks Blakasuta
Keterangan jilbab punuk onta :
Sumber gambar:
